4 Arestado sa ginpatigayon nga buy-bust operation sa Koronadal City.

Arestado ang apat ka mga persona sa ginpatigayon nga buy-bust operation sang gintingob nga pwersa sang Philippine Drug Enforcement Agency (PDEA) – South Cotabato Provincial Office, South Cotabato Provincial Drug Enforcement Unit kag Koronadal City Drug Enforcement Unit kahapon nga adlaw, Pebrero 25, 2019.
Sa ginpatigayon nga buy-bust operation alas 12:50 sang hapon sa Osita Block 1, Brgy. Zone II, Koronadal City, naaresto sanday Sonny Pomperada Vergara, alias Soy-Soy, 24-anyos, single, residente sang nasambit nga lugar kag Joseph Cabrido, 21-anyos, single kag residente sang Morrow Aquino Ext., Koronadal City.
Nakuha sa mga suspek ang tatlo ka pack sang suspected dried marijuana leaves nga may kabug-aton nga more or less five (5) grams kag nagakantidad sang P600.00.
Si Vergara ang nagatrabaho suno pa nga barangay Task Enforcer kag namonitor na sang pipila ka semana sa ilegal sini nga buluhaton.
Samtang, sa follow- up operation base naman sa ginhatag nga impormasyon nanday Vergara kag Cabrido pasado alas 2:00 sang hapon sa Purok Casa, Block 1, Brgy. Zone III, Koronadal City, naaresto naman sanday Bensh David Pascual, 21-anyos, single, jobless kag Joefher Miles Catalan, 18-anyos, single, jobless, kag residente sang Purok Casa, Block 1, Brgy. Zone III, Koronadal City.
Nakuha naman sa mga suspek ang isa ka pack sang dried marijuana leaves nga may kabug-aton nga more or less 250 grams kag nagakantidad sang P30,000.00.
Sa subong, ang apat ka mga suspek ang nakadetine na sa PDEA ROXII Detention Facility kag nagapangatubang sang kaso nga pagbayolar sa Section 5 (Sale of Dangerous Drugs), samtang si Vergara kag Cabrido ang nagapangatubang sang dugang nga kaso nga pagbayolar sa Section 11 (Possession of Dangerous Drugs), sang Article II of Republic Act 9165 ukon The Comprehensive Dangerous Drugs Act of 2002.
photo credit to PDEA12


Facebook Comments