Pagadian City – Nalubong na ang upat nga natalang namatay nga probable PUI COVID 19 patients dinhi sa probinsya.
Sa gipagawas nga kasayuran sa Zamboanga del Sur Task Force Covid 19, Abril 16 – nabugtuan sa kinabuhi ang gikonsiderang probable PUI patient nga usa ka 86 anyos nga babayeng residente sa Brgy. Danlugan, ning syudad sa Pagadian.
Abril 17 – namatay usab ang probable patient nga usa ka 52 anyos nga lalaking taga Brgy. San Jose, lungsod sa Aurora, Zamboanga del Sur.
Sa susamang petsa, gibawian usab sa kinabuhi ang probable patient nga mao ang usa ka 50 anyos nga lalaki nga residente sa Tuburan, Pagadian City.
Kaniadtong Sabado, Abril 18 – namatay usab ang probable( PUI) case, nga usa ka 73 anyos nga lalaki kinsa lumulupyo sa Balangasan, Pagadian City.
Sa bag-ong klasipikasyon sa COVID 19, ang PUI naglangkob sa SUSPECT ug PROBABLE.
Ang mga gikonsiderang lakip sa kategoryang SUSPECT case mao ang mga adunay Influenza-like illness o nakasinati ug paglain sa pamati sa lawas, adunay taas nga hilanat, ubo, pangatol ug panakit sa tutunlan.
Malakip usab sa kategoryang Suspect ang Adunay Severe Acute Respiratory Illness (SARI) kon diin ang pasyente gibati ug kahangak o lisod nga pagginhawa o adunay grabeng pulmonya o sakit sa baga.
Ang mga upat ka mga namatay nga PUI pulos mga naapil sa kategoryang probable case sa COVID 19.
Nagpasabot nga nakasinati sila sa nahisgutang mga sintomas nga anaa sa suspect category apan dili pa kompirmado gumikan kay kasamtangang gihulat pa ang resulta sa test kung positibo ba sa COVID 19.
