Bukidnon – Gihimakak sa kapulisan ang gi-ingong 15 ka armas ang nakuha sa mga New Peoples Army kon NPA human gilusob ug gisunog ang building sa Davao Agricultural Ventures Corporation (DAVCO) nga nahimutang sa Brgy. Merangeran, lungsod sa Quezon, Bukidnon.
Sa interview sa RMN Malaybalay ngadto kang SPO3 Reynold Bangcong, ang investigator sa Quezon Municipal Police Station kon QMPS gibutyag niini nga upat lang ka mga armas ang nakuha sa NPA sukwahi sa pamahayag sa grupo nga 15.
Matud ni Bangcong nga apil usab sa gipangsunog sa mga NPA ang usa ka boom harvester, usa ka boom sprayer, duha ka nurse truck ug usa ka generator set.
Gipabuthan usab sa NPA ang warehouse sa kompanya sa duha ka improvised explosive device kon IED.
Padayon karon ang gihimong imbestigasyon sa PNP Quezon human ang gihimong pagpangharas, pagdis-arma ug pagpanunog nga gihimo sa NPA.
Nasayran nga karong tuiga lang ikaduha na kini ka higayon nga giharas ang mao nga kompanya sa walhong grupo, ang una kaniadtong Pebrero.
