Gibuhian na kaganehang alas 4 sa kadlawon ang mukabat sa 40 ka mga miyembro sa sa Moro Islamic Liberation Front kon MILF nga nadakpan sa checkpoint sa Barangay Tikalaan, Talakag, Bukidnon alas 3:11 sa hapon kagahapong adlawa.
Sa interview sa RMN DXMB Malaybalay ngadto kang Police Captain Dominador Orate Jr., ang hepe sa Talakag Municipal Police Station gibutyag niini nga samtang nagpahigayon sila ug strong checkpoint sa mao nga dapit kauban ang kapulisan sa Baungon ug Libona MPS ug ni-agi ang usa ka elf truck nga adunay sakay nga 40 ka mga kalalakin-an nga gikan sa Maguindanao ug ila kining gisita.
Sa gihimong pag-inspeksyon ug pag-search sa kapulisan sa ilang mga gamit didto ilang nakumpiska ang 1 ka M-14 US Rifle, 1 ka sa fragmentation grenade, usa ka bandolier sa M14, usa ka hand held radio, 6 ka magazine, 51 ka mga buhing bala sa M-14 hinungdan nga ila kining gidakop.
Apan matud ni Capt. Orate nga ila nang gibuhian ang maong 40 ka mga miyembro sa MILF kagahenang alas 4 sa kadlawon human nga nagpataliwala ang Office of the Presidential Adviser on the Peace Process (OPAPP) alayon sa agreement kon kasabutan nga gipirmahan tali sa gobyerno sa Pilipinas ug sa mao nga grupo.
Dugang ni Orate nga paingon unta ang mao nga grupo sa Kiayamoc aron sa pag-ugmad sa yuta nga gihatag kanila.
Giklaro usab sa hepe nga wala nila gi-release ang mga armas ug ubang pang kontrabando nga ilang nakumpiska.
Sa karon gihupay ni Orate ang kabalaka sa publiko ilabina sa lungsodsa Talakag, Bukidnon.
