General Santos City—mukabat sa 400 ka mga binipisyaryo sa Barangay Bawing, Gensan ang nakadawat ug food Packs gikan sa Metrobank Group ug GT Capital Holding pinaagi sa inisyatibo sa ilang Chairman nga si Dr. Jorge S.K. Ty alayon sa selebrasyon sa Chinese New Year.
Ang programa gitawag ug Giving the “Bags of Blessings”. Alas 9:00 ang takna sa buntag kaganina dihang gisugdan ang pagpang apod-apod ug mga Food packs ngadto sa 400 ka mga pamilya nga gipahigayon sa Barangay Hall sa Barangay Bawing Gensan.
Gipangunahan sa mga representanti gikan sa Metrobank inabagan sa mga personahe gikan sa DSWD. Anaa usab ang presensya sa PNP ug AFP atol sa maong event, samtang suportado usab sa Catholic Bishop Conference of the Philippines (CBCP) ang maong programa.
Ang food packs nagkantidad ug kapin P1,000.00 samtang gawas niini aduna usay laing bags alang ngadto sa mga bata nga nagkantidad ug P500.00.
Nasayran nga sa kinatibuk-an mukabat sa 10 mil ka mga pamilya ang makabinipisyo sa programang hatud sa Metrobank sa 21 ka syudad ug munisipalidad sa nasud.
Karong tuiga anaa na sa ika-unom ka tuig nga gipasiugda sa Metrobank ang maong programa.
Sumala ni Ray sabino, head sa Purple Hearts Foundation Gensan nga kung mamahimong nindot ang feedback sa maong programa, lauman nga kini magpadayon aron nga daghan pa ang ilang matabangan.
Samtang hilabihan usab ang pagpasalamat sa mga binipisyaryo sa programa gumikan dako matud pa kining tabang sa ilang matag pamilya hilabi na sa kalisod sa panahon sa kasamtangan.
