BACOLOD CITY – Ginsumbag sang nagama-uy nga lalaki ang isa ka miembro sang PNP nga nagabantay sa kahiwatan sang Bacolaodiat Festival sa dalan Lacson kagab-i.
Nakilala ang amo nga pulis nga si PO2 Rommel Rizalde samtang ang suspek naman na identify nga si Jonel Dajao, 31 anyos ang edad, pumuluyo sang Minlo Tres, Brgy. Zone 10 ciudad sang Talisay.
Sandig sa imbestigasyon sang Police Station 2, nagpalapit si PO2 Rizalde sa biktima agud kuntani i-pacify lang ini kay nagatuga siya sang alarma kag eskandalo.
Apang, imbes nga mag-untat, nag-wadang pa gid ang suspek kag iya ginsumbag ang pulis.
Maswerte naman nga naka-likaw ang amo nga police officer kag wala ini naigo.
Sa pihak nga bahin, nabun-an naman sang alasalan ukon barbecue stick ang isa ka menor de edad samtang nga nagalagaw-lagaw sa dalan Lacson angut sa Bacolaodiat, pasado las 12 kaina sang tungang gab-i.
Ang biktima gintago lang sa ngalan nga Toto, 14 anyos ang edad sang Brgy. Vista Alegre.
Suno sa imbestigasyon, nasugata sang biktima ang isa ka grupo sang mga lalaki kag isa sini sa ila ang hinali na lamang nga nagbuno sa iya.
Igo sa iya dughan ang naangkon sang biktima kag padayon ini karon nga ginabulong sa Corazon Locsin Montelibano Memorial Regional Hospital./dyHB BACOLOD
