MIABOT ngadto 463 ka mga indibidwal ang kinatibuk-ang naaresto sa kapulisan nga nakasupak sa health protocols sa Department of Health. Kini ang kabahin sa nahimong accomplishment report nga gipresenta Bukidnon Police Provincial Office sa pagpanguna ni Provincial Director PCol. Roel L. Lami-ing sa gipahigayong Provincial Peace and Order Council (PPOC) ug Provincial Anti-Drug Abuse Council (PDAC) meeting.
Basi sa nahimong report sa kapulisan sa ilang Accomplishment On Health Protocols sugod Marso 17, 2020 hangtud Nobyembre 24, 2020, mikabat ngadto sa 608 ka kaso ang natala sa ilang buhatan sa 20 ka lungsod ug 2 ka syudad ning Probinsya sa Bukidnon diin 463 niini ang naaresto.
Nag-una niini nga kaso ang mga nakasupak sa Curfew nga adunay natala nga 205 ka kaso diin nag-una niini ang dakbayan sa Valencia nga adunay 116 ka indibidwal ug nagsunod ang lungsod sa Kibawe nga 14 ug adunay 13 sa Maramag ug dakbayan sa Malaybalay.
Nagsunod niini ang kaso sa No Face Mask No Entry nga adunay 166 nga natala diin nag-una ang munisipyo sa Quezon nga adunay 43 kabouk ug nagsunod ang Lantapan nga adunay 41 ka indibidwal nga wala nagsuot sa face mask.
98 usab ka kaso ang natala nga nakasupak sa Social Distancing diin nag-una ang syudad sa Valencia nga adunay 48 ka kaso ug nagsunod ang Maramag nga adunay 15 ka kaso. 65 ang natala sa kasong Liquor Ban diin nag-una gihapon ang syudad sa Valencia nga adunay 36 ka kaso ug gisundan sa 12 ka indibidwal sa Talakag.
Mikabat usab ngadto sa 34 ka kaso ang natala sa Disorderly Behaviour Triggered By Drunkenness diin nag-una ang lungsod sa Talakag sa ilang 12 ka kaso ug nagsunod ang Quezon nga adunay 7. 20 usab ka indibidwal ang nakasupak sa No Back Ride Policy ug 6 ka kaso ang No Quarantine Pass. 14 ka mga indibidwal ang nakasupak sa uban pang ordinansa nga anaa sa ilang area of responsibility.
