Dinas, Zamboanga del Sur – Gipangita na karon sa kapulisan sa lungsod sa Dinas ang Barangay kagawad nga resposable sa pagpangluba alas 9:00 kagabii sa Purok 2, Barangay Legarda 2, Dinas, Zamboanga del Sur.
Gidala karon sa ospital ang biktima nga si Aurelio Pugoy Pudin, 42 anyos, laborer ug residente sa Brgy. Legarda 1, Dinas, human kining giluba sa suspek nga si Ronald Sambilad, konsihal sa Brgy Sumpotan, Dinas,.
Sa inisyal nga imbestigasyon nasayran nga nagtagay pa ang biktima ug ang suspek sa Brgy. Biray, partikyular sa Landiao store isip kabahin sa pagsaulog sa Araw ng Barangay Biray,
apan pipila ka oras ang nilabay nagbikil ang biktima ug ang suspek nga misangko sa pagpangluba.
Igo ang tiyan sa biktima rason nga gidala sa ospital ang biktima ug dali usab nga niikyas ang suspetsado.
Personal nga bangi ang gisundan nga motibo sa kapulisan sa maong pagpangluba samtang naglusad na usab sila sa hot pursuit operation alang sa pagsikop sa suspek nga niikyas paingon sa Legarda 1, Dinas ning probinsya.
