TACLOBAN CITY – Gindumara kakulop nga adlaw an initial implementation launching han PUV Modernization Program ha Pilipinas ngan pinaka-una ini ha syudad han Tacloban. 45 nga mga solar e-Jeepneys an ginlunsar ha ilarom han programa han National Government nga transportation modernization program.
Sumala kan Department of Transportation Assistant Secretary Mark Richmund de Leon, an syudad han Tacloban an napili kumo pinakauna nga lugar nga magkakamayada hin e-PUV’s nga magsiserbe ha sobra 8,000 nga mga pamilya nga na relocate ha Northern barangay han syudad.
Dida han nakalabay nga Desyembre tuig 2017, nagtikang an pag biyahe han 15 nga mga e-jeepneys nga may ruta nga Tacloban-Tagpuro.
22 an setting capacity han kada usa nga unit han e-jeep lakip na an driver ngan an konduktor. Ha kada-usa nga unit in mayada TV, dash cam, CCTV ngan may free wifi pa.
Plano naman han DOTr nga magin automatic fare collection an sistema ha pagbayad kun diin pinaagi ha card magbabayad an usa nga pasahero.
Sumala naman kan William Rael, 32 anyos, ngan driver han usa nga unit han e-jeep, in mas komportable ngan mas dako an iya kita kumo driver han e-jeep.
