Patay ang isa ka lalaki matapos ginluthang sa Barangay Lawaan, Roxas City. Ginkilala ang biktima kay Restituto Moreno, 46 anyos, residente sang nasambit man nga lugar. Nag-angkon sang patal nga pilas ang sa nagkatuhay nga parte sang iya nga lawas ang biktima nga gintunaan sang iya nga kamatayon matapos ginluthang sang suspek nga si Rafael Yamson, 31 anyos sang nasambit man nga barangay. Gintinguhaan pa ini nga madala sa ospital apang gindeklarar nga dead-on-arrival.
Ginpahayag ni Punong Barangay Elvis Asis, nga nag-estoryahanay na ang biktima kag ang suspek nga si Rafael Yamson, 31 anyos, sa iya nga talatapan angut sa reklamo sang biktima sa mga nagguba sang gina-claim nga poluy-an sang iya live in partner. Nahibaluan nga ginsuhulan gid lamang si Yamson sang pamilya sang live in partner sang biktima agud gub-on ang balay bangud may yara na sang buyer ang duta nga ginatindugan sini.
Nagluntad ang pagbinaisay sa tunga sang duha ka mga persona sang sila ang ginhusay sa barangay hall sang Lawaan. Apang natapos lamang ang ila nga pag-estoryahanay nga wala nagkasugot ang magtimbang nga bahin. Sang nagpauli na ang mga ini sa ila tagsa ka mga panimalay padayon sa gihapon ang pagbais sang biktima sa suspek. Bangud sang pagpanggarit-garit sang biktima napilitan nga luthangon ini sang suspek.
Samtang naghatag naman sang panugyan si Punong Barangay Asis sa suspek nga si Rafael Yamson nga magsungka sa mga kapulisan kag atubangon ang nakomiter nga krimen sa pagluthang kay Restituto Moreno.
