Roxas City, Capiz – Patay ang 47- anyos nga lalaki matapos ini ang ginbuno sang makapila ka beses sang mismo kaupdanan sa pag- inom sa birthday party sa Brgy Bunga banwa sang Mambusao alas 9:10 sang gab-i.
Nakilala ang biktima kay Catalino Quiachon y Ligazpe sang Brgy Caidquid, Mambusao, Capiz kun sa diin ini ang nag-angkon sang madamo nga mga kapilasan sa lawas tuga sang buno sang ginatudlo nga suspek nga nakilala kay Juvy Barquilla y Leal, 37- anyos kag residente sang Brgy Bunga Mambusao.
Suno sa inisyal nga imbestigasyon sang mga kapulisan, naghangkatanay sang away ang duha sa guha sang poluy-an kun sa diin sila ang naga-inom.
Una nga naggabot sang kutsilyo ang biktima kag ginbuno ang suspek apang madasig sini nga naagaw ang kutsilyo kabangdanan sang pagbalos kag pagbuno ni Barquilla sa biktima nga si Quiachon nga nangin rason sang gilayon sini nga kamatayon.
Narekober sang mga kapulisan ang 12- pulgadas nga kahabaon sang kutsilyo.
Samtang, nag-execute naman sang affidavit nga indi na magpasaka sang kaso sa suspek ang pamilya sang napatay nga biktima.
