48 kabuok indibidwal nasita sa una na adlaw sa implementasyon sa General Curfew sa Surigao City
Moabot sa 48 kabuok mga indibidwal an tagsita nan mga kapulisan na kon diin 32 an mga menor de edad, ini sa dihang tagsugdan an implementasyon sa General Curfew sa Surigao City kagabii.
Namahayag an Chief of Police nan Surigao City, Supt. Jay Baybayan an mga nolapas sa General Curfew na kon diin tagdili na an paglatagaw sa kadayanan gikan alas 12:00 sa tungang gabii hangtud alas 4:00 sa kaadlawon an tag-imbitahan sa kuwerpo nan kapulisan ug didto taghimo an beripikasyon pareho sa pagkuha sa mga ID ug pagtino sa rason kon uno na adto pa sa tunga sa kadayanan. Kasagaran na rason gumikan kay notambong sa vigil ug an iban gikan sa mga imnanan. Boluntaryo an mga ini na miiban sa mga kapulisan ug tanod lakip na tagpa-ilayom sa pagpahibayo kalabot sa ila nalapas ug an pahimangno sa hugot na pagpatuman sa curfew.
Dugang pa ni Supt. Baybayan, duha an ila nahimong tagpatuman gabii, curfew base sa City Ordinance 310 sa mga menor de edad gikan alas 10:00 sa gabii hangtud alas 4:00 sa kaadlawon samtang an General Curfew gikan alas 12:00 sa tungang gabii hangtud alas 4:00 sa kaadlawon para sa tanan indibidwal lakip na an hingkod an pangidaron.
