BACOLOD CITY – Ginpadakup kag ginpa-blotter sang supervisor sang isa ka mall ang isa ka security guard bangud nga nagkaon ini sang tinapay nga gina-deliver sa amo nga balaligyaan.
Nakilala ang supervisor nga si Emmanuel Tagulalac, 30 anyos, pumuluyo sang Purok Tinagong-paraiso, Brgy. Banago samtang ang security guard naman amo si Jundel Melgar, 23 anyos ang edad, soltero kag pumuluyo sang Brgy. Molocaboc, Sagay City.
Suno sa tagreklamo, naga duty kahapon ang amo nga security guard nga naka assign sa delivery area sang mall kag may isa ka merchandiser nga nakilala kay Mike Dusaran ang nag-report sa supervisor nga nagkuha sang tinapay si security guard kag iya ginkaon.
Bangud sini, ginpadakup ni Tagulalac si SG Melgar kag sang ginpamangkot kon ngaa nahimo niya ini, hambal sang security guard, napilitan siya nga magkaon sang tinapay bangud nga ini ang nagutom./dyHB BACOLOD
