Gihagit karon sa 4th Infantry Division, Philippine Army ang mga nag-akusa sa ilaha nga nakalapas sa katawhanong katungod nga muduso ug pormal nga reklamo ngadto sa ilang kadagkuan o kaha sa korte.
Reaksyon kini sa 4th ID human nga adunay pipila ka grupo ang nanawagan nga ihunong na ang gipatuman nga martial law sa Mindanao tungod sa daghang ihap sa human rights violations.
Una nang gikondena sa Kalumbay Lumad Regional Organization ang padayon nga pagpatuman sa martial law sa Mindanao tungod kay miresulta kini sa daghang kaso sa pagpanglapas sa tawhanong katungod hilabi na kanamong mga Lumad nga padayong nakigbisog alang sa yutang kabilin ug katungod sa kaugalingong paghukom.
Sa interview sa RMN Malaybalay ngadto kang 1LT Tere Ingente, *Public Affairs* Office chief of the Army’s 4th Infantry Division gibutyag niini nga kadaghan na sila nakadungog sa mao nga pasangil apan sukad sa pagpatuman sa Martial law hangtod karon, wala pa matud pay nagduso ug pormal nga reklamo ngadto sa 4th ID.
Maong hagit ninii sa mga biktima sa gi-ingong human rights violations nga mudangop sa hingtungdanan unit aron ilang ma-imbestigahan ug mahatagan ug aksiyon.
Hugtanon usab daw nga gipahimangno ni MGen. Ronald Villanueva ngadto sa tanang puwersa sa AFP ilawom sa 4th ID nga dili mag-abusar sa martial law tungod kay dili usab niya kini e-tolerate ug siguradong ma-atubang sa sanction kung mapamatud-an.
