4th ID, naghangyo og tabang sa mga mayor sa Misamis Oriental

Nanawagan si 4^th ID chief Major General Ronald Villanueva sa mga mayor sa Misamis Oriental nga  motabang sa kampanya sa mga sundalo sa gobyerno aron pugngan ang dautang plano sa mga rebeldeng New Peoples Army.

Ang panawagan ni General Villanueva atol sa gihimong orientation sa League of Municipalities of the Philippines  kon  LMP Misamis Oriental Chapter sa Camp Evangelista patag ning syudad kagahapon sa buntag.

Ang maong LMP Orientation, gitambongan sa 15 sa 25 ka mga mayor sa  Misamis Oriental.

Matud ni Villanueva nga kon dili motabang ang mga mayor sa kampanya sa mga sundalo batok sa mga NPA walay maayong kaugmaon ang sunod nga henerasyon.

Ang pahayag ni Villanueva, human gibutyag ni 403^rd Brigade Col. Edgardo de Leon nga  dunay kapin sa 30 ka mga barangay sa Misamis Oriental nga nasudlan na sa mga NPA.

Matud ni de Leon nga nagpadayon ang mga NPA sa pag-pang-recruit ug ilang gi-aghat ang mga tawo sa kabarangayan nga mo-apil sa ilang pakig-away sa gobyerno.