Davao City – Nakauli na sa ilang mga pamilya sa Bukidnon ang 5 ka mga Manobo kinsa mga kanhi sakop sa rebeldeng New People’s Army.
Nitahan kini sa ilang mga kaugalingon niadtong Hulyo 5, 2018 sa 4th Infantry Battalion, ubos sa 7th Infantry Division Philippine Army sa may Brgy. Tagodtod, Lagangilang, Abra Province, Cordillera Administrative Region.
Gikan sa 7th ID giturn-over sila sa 4th Infantry Division ngadto sa lokal nga panggamhanan sa Bukidnon.
Giila ang kanhi mga rebelde nga sila alyas Marco, 18 anyos, taga-Brgy. Cabanglasan, Malaybalay, alyasJomar, 17 anyos, Brgy. Namnam, San Fernando, Alyas Gerald, 17 anyos, Alyas Macoy, 18 anyos ug Alyas Deboni, 19 years old, pulos mga taga-Brgy. Cawayan, San Fernando, Bukidnon.
Sumala ni Brigadier General Eric Vinoya, Commander sa 403rd Infantry Brigade, Philippine Army nga gipangita sa mga militar ang mga ginikanan sa mga batan-on aron makauli na kini sa ilang mga lugar.
Gipailawom na ang mga kanhi rebelde sa Enhanced Comprehensive Local Integration Program (E-CLIP) Committee sa Bukidnon atol sa usa ka seremonyas sa kampo sa 403rd IB sa may Camp Osito Bahian, Malaybalay, Bukidnon niadtong Sabado.
Nidawat sila og tag- P10,000 silbing cash assistance ang mga surrenderees gikan sa lokal nga gobyerno sa Bukidnon.
Sumala sa Eastern Mindanao Command nga niadtong Agosto 2017 gipang-recruit ang lima aron magtrabaho sa usa ka babuyan sa Manila isip caretaker sa sweldo nga P8,000.
Saysay sa mga surrenderees nga pag-abot nila sa Manila gidala sila sa usa ka Aeta kun IP Village sa UP Diliman ug gipaapil na sila sa mga lihok protesta sa maong dapit.
Gipadala sila ngadto sa Abra aron muapil sa kalihukan sa NPA una pa man sila ni-surrender karong bulana.
RadyoMaN Aimee Guinita
