Singko mil pesos ang multa sa si bisan kinsang negosyante sa Cagayan de Oro nga nag-operate gamit ang pekeng business permit.
Kini ang gibahad ni Assistant City Treasurer Engr. Leonil Mistula atol sa tigom nga gidumala ni City Administrator Teddy Sabuga-a Jr. bag-ohay lamang.
Gipasabot ni Sabuga-a nga angay lang nga masilotan ang naggamit og pekeng business permit tungod kay pagpanikas kini sa kagamhanan sa syudad ug unfair usab sa ubang mga negosyante nga legal ang pag-negosyo.
Nakadawat og report ang Treasurer’s Office gikan sa mga inspectors ug tax mappers sa City Treasurer’s Office nga naay pipila ka mga negosyante ang matud pa, gabuhat sa maong modus.
Tungod niini, gimando usab gilayon ni Sabuga-a ang masubsob nga inspection sa mga establisemento aron pagtino kung nagbaton ba kini og legal nga business permit.
Nasayran nga gipalapdan karon sa kagamhanan sa syudad ang Joint Inspection Team nga gitahasan pagsusi sa nagkadaiyang mga establisemento kung nakatuman ba kini sa mga balaod ug regulasyon.
