BAGO CITY, NEGROS OCCIDENTAL – Hugot ang pagpati sang mga utod kag kaingod balay sang 5-anyos nga nasapwan patay nga ini siya ang ginlugos sang ila man lamang kaingud balay sa Bago City.
Suno sa utod nga ihinago lang sa ngalan nga Inday, 17 anyos, nga pasado las 4 kahapon sang naghalin sa ila balay ang iya manghod kag wala na nakabalik.
Bangud sini, gilayon nila nga ginpangita ang biktima kon diin halos 3 na ka purok ang naglibot pangita sa bata.
Pasado las 12 sini nga udto, nasapwan ang bangkay sang bata nga ginsulod sa saku kag ginlubong pa sa basurahan mga 20 metros lang ang kalayuon sa ila balay.
Ginpahayag sang isa pa ka utod sang biktima nga kilala nila ang suspek nga amo si Alyas Daku, 45 anyos ang edad kag pumuluyo man sang amo nga lugar.
Nagapati ang pamilya kag ang mga tawo sa amo nga purok nga si Alyas Daku ang may kahimuan sang krimen bangud nga sang nakita niya nga may pulis, ini siya ang gilayon nga nagpalagyo.
Nakita nga may pilas sa likud sang iya ulo ang biktima kag nakita man nga duguon ang sensitibo nga bahin sang iya lawas gani nagapati sila nga ini ang ginhimuslan.
Nahibaluan nga ang biktima ang may yara sang napulo ka iban pa gid nga mga kauturan./ Web graphics/ Credit to the owner
