Mokabat sa 500 mga portable pumps ug engines ang gihatag sa Department of Agriculture kon DA Region 10 sa lain-laing probinsya sa rehiyon ilabina sa Bukidnon.
Matud ni DA 10 Regional Director Carlene Collado nga kini isip tabang sa mga mag-uuma nga maapektuhan sa hinay nga El Niño.
Gibutyag ni Collado nga duna pay 100 ka mga portable pumps ang dugang ihatag sa DA sa mga lugar nga nanginahanglan niini.
Gipahimangnoan na usab sa DA ang mga mag-uuma nga dili una magtanom karong bulan sa Marso hangtud sa Mayo.
Gipasabot ni Collado nga ang mga naapektuhang mag-uuma, mao tong nagtanom sa bulan sa Nobyembre hangtud Disyembre sa milabayng tuig apan katong nagtanom niadtong bulan sa Oktubre ug Nobyembre nakaharvest pa sa ilang mga gitanom.
Nasayran nga ang normal season naa sa bulan sa Nobyembre ug Marso samtang ting-ulan sa bulan sa Hunyo hangtud Setyembre.
Gidugang niini nga nagtukod na usab karon ang DA sa Solar Irrigation System nga nagkantidad sa 44-Billion Pesos alang sa mga upland areas sa tibuok nasud.
