Nagalab-ot sa 53 ka mga balay ang naanod kag naguba sang nagaragasa nga tubig baha kag mga troso sa Brgy. Daguma, Bagumbayan, Sultan Kudarat alas 5:30 sang hapon, kahapon nga adlaw, Hunyo 27, 2021, base sa ila inisyal nga assessment suno kay Brgy. Daguma Kapitan Merilo Cordero. Sa kabug-usan yara suno pa sa 815 ka mga pamilya ang apektado sang pagbaha sa mga sitios sang Purok 1,2, 5 kag 6, Sitio Cabuling kag Linapawan sang Brgy. Daguma nga malala nga naapektuhan. Ginpahayag man ni Kapitan Cordero nga malapit man sa isa ka libo ka ektarya nga mga pananom partikular na palay ang natabunan sang madamol nga lutak. Ginkumpirmar man ni Kapitan Cordero nga nakahatag naman sila sang inisyal nga ayuda kag sa subong padayon ang ila nga repacking sang relief goods para sa mga apektado nga mga residente sang pagbaha. Temporaryo naman nga magatinir sa Brgy. Plaza kag eskwelahan ang mga nawad-an sang balay. Ginkumpirmar man sang opisyal nga wala sang narekord nga casualties sa pagbaha tungod naimpormar man ang mga residente. Nagaapela naman sang bulig ang Kapitan para sa mga residente sini nga naapektuhan sang pagbaha. Suno kay Cordero napaidalom na sa state of calamity ang Brgy. Daguma sang nagbaha sang Hunyo 2.
