Patay ang isa ka 55 anyos nga lalaki matapos gintiro sang suspek sa Sitio Mambucano, Barangay Cabatangan, syudad sang Talisay, Negros Occidental, la 1:30 kaina sang hapon, Hunyo 15.
Ginkilala ang biktima kay Ismael Siason, residente sang nasambit nga lugar samtang ang suspek naman amo si Rolly Treveles, residente sang Hope Village, Barangay Cabatangan syudad sang Talisay.
Suno kay Police Major Jigger Gemino, hepe sang Talisay City PNP sa interview sang DYHB, nagalakat lang ang biktima sa nasambit nga lugar sang ginpunduhan ini sang suspek sakay sang ginamaneho nga salakyan kag ginkompronta ang biktima bitbit ang armas luthang kag sang hinali nga ginluthang ang biktima.
Nakadalagan pa ang biktima apang gin pasundan pa sang tiro sang duha ka beses sang suspek sang wala pa matumod nga armas.
Dugang pa ni Gemino, may yara na sang daan nga away ang duha bangud ang asawa sang biktima ang nag-upod na sa suspek.
Dead-on-arrival (DOA) si Siason sa ospital.
Gilayon nagpalagyo ang suspek samtang padayon naman ang imbestigasyuon sang otoridad sa insidente.
[image: image.png]
