Naglunsad karon sa Clearing operation ang mga sundalo sa 58th Infantry Battalion aron pugngan ang dautang plano sa mga rebeldeng New Peoples Army kon NPA nga makapangataki sa ilang ika 50 ka tuig nga anibersaryo sa March 29.
Kini ang gibutyag ni 4th Infantry Division Philippine Army, Spokesman Capt. Regie Go.
Ang pahayag ni Go human sa nahitabong panag-engkuwentro mga alas otso kagahapon sa buntag tali sa mga sundalo ug rebeldeng NPA sa Sitio Pugahan, Barangay Bunal, lungsod sa Salay, Misamis Oriental.
Matud ni Go nga naglunsad sa ilang combat operation ang mga sundalo sa 58th IB sa dihang ilang nasugat ang wala maihap nga gidaghanon sa armadong mga rebelde ug nahitabo ang engkwentro nga mokabat sa kapin kon kulang 10 minutos.
Hinoon matud ni Go nga walay namatay o na-angol sa panig sa mga sundalo.
Wala pay reports ang 58th IB kon duna bay patay o samaran sa panig sa mga rebelde.
Matud ni Go nga nag-double time karon ang mga sundalo sa 4th ID sa ilang combat ug clearing operation aron dili maka porma ang mga rebeldeng komunista sa adlaw sa ilang anibersaryo.
