Ginpahayag ni anay Punong Barangay Roy Giganto sang Barangay Lahug, Tapaz , Capiz nga may 6 ka miyembro sang Philippine army nga nangsita kag nanaya sang armas luthang sa 3 ka mga tumandok sa bahin sang Barangay Tacayan kag Lahug, Tapaz, Capiz.
Suno kay Giganto, naglabay sanday Mario Aguirre upod ang bata niya kag ang bayaw sa bahin sang Barangay Tacayan kag Lahug agud magdeliver sang saging sang nagligad nga Dominggo,Nobyembre 5 apang sang nagpauli na ang mga ini, ginharangan sila sang kapin 6 ka mga miyembro sang Philippine Army nga wala naka-uniporme.
Dugang pa ni Giganto, ginpabalik ang mga ini kag pisa-pisa sang pamangkot kon may mga NPA sa ila lugar.
Tuman naman ang kahadlok sang bata ni Aguirre bangod may nagasenyas nga ginagulgol ang liog kag daw kasubong nga patyon sila.
Suno kay Giganto, mahimo may malain nga natabo sa 3 ka mga tumandok kon nagpasugot ang mga ini nga dal-on sang mga army sa ila ginahukmungan.
Apisar ginbuy-an ang tatlo matapos ang 30 minutos, nagtuga naman ini sang kakulba kag kahadlok ilabi na sa menor de edad nga anak ni Aguirre bangud sang pagpanaya sang armas luthang sang mga suldado.
Dugang pa ni Giganto, makapila naman ka beses nga nagpadulong sa ila lugar ang mga nagapakilala nga miyembro sang Philippine Army kadungan sang ila kahiwatan apang nagatuga sang kahadlok sa mga pumuluyo.
Ginatan-aw ni Giganto nga posible may kaangtanan sa pagapatindugon nga dam ang presensya sang mga miyembro sang Philippine Army sa ila lugar agud ma-clear ang area kon sa diin apektado naman kag delikado para sa mga pumuluyo nga yara sa lugar.
(photo from web)
