NEGROS OCCIDENTAL – Ginklaro karon sang Philippine Army sa Negros nga indi mga katapo sang New People’s Army ang 60 ka mga tawo nga ginasiling damlag pa rebelde nga nagbalik na sa sabak sang gobierno gikan sa duha ka mga barangay sa banwa sang Binalbagan sadtong nagligad nga adlaw.
Suno sa acting CMO Officer ang 62nd Infantry Batallion, Philippine Army sa Negros Occidental nga si Lt. Maria Allein Veluz, may natabo gid lamang nga misinterpretation kon diin ang ini nga 60 ka mga tawo ang mga sibilyan kag masa gid lamang.
Ginpaathag ni Veluz nga ang Oath of Allegiance isa ka programa sang mga soldado upod ang LGU nga nagatuyo nga kuhaon ang suporta sang mga tawo para sa gobierno kag indi sa rebelding NPA.
Pahayag pa niya sini nga ang 60 ka mga tawo ang sibilyan kag nagsumpa nga indi sila magsuporta, maghatag impormasyon kag bulig sa mga rebeldeng NPA./dyHB BACOLOD
