Gipaningkamotan nila Kabayan Party-list Representative Ron Salo ug Ciriaco Calalang nga himoong 600 pesos ang adlawang sweldo sa mga trabahante sa pribadong sektor sa tibuok nasud.
Gipasaka sa duha ka magbabalaod ang House Bill 7527 nga nagtumong nga ipareho na ang tanang kita sa mga mamumuo sa lain-laing rehiyon sa sweldo sa mga empleyado sa Metro Manila.
Tungod niini, gilauman matud pa nga dili na magsiksikan sa National Capital Region o NCR ang mga trabahante.
Gawas niini, aduna na usay limitasyon ang gahom sa National Wages and Productivity Commission ug sa Regional Tripartite Wages and Productivity Boards sa pagtumbok kung pila ang kitaon sa mga mamumuo.
Samtang, 705 pesos usab ang hirit sa grupong Makabayan Bloc isip national minimum wage.
Matud ni Anakpawis Representative Ariel Casilao, panahon na aron tas-an ang minimum wage aron makasabay usab kini sa pagtaas sa presyo sa mga palaliton ug serbisyo sa nasud tungod na usab sa TRAIN Law.
Kasamtangang anaa sa 515 pesos ang minimum wage sa Metro Manila samtang mas ubos usab sa ubang rehiyon sa nasud.
