Makabenepisyo sa P1.24 billion development project sang gobyerno ang 62 ka mga barangay sa rehiyon dose nga natumod nga “cleared” sa idalom sang Community Support Program ukon CSP sang militar kag receipient sang Local Government Support Fund-Support to Barangay Development Program ukon LGSF-SBDP.
Sa nasambit nga numero 36 ka mga barangay nga makabaton sang tig P20 million ang yara sa Cotabato Province, 13 sa Saranggani, 12 sa Sultan Kudarat kag isa sa South Cotabato.
Suno kay Department of Budget and Management ukon DBM 12 Regional Director Akmad Usman, ang notice of cash allocation sang LGSFP-SBDP sa region 12 ang naforward na nila sa Bureau of Treasury.
Samtang ginpahayag naman ni Department of the Interior and Local Government ukon DILG 12 Regional Director Josephine Leysa nga ang SOCCKSARGEN ang isa sa una nga mga rehiyon sa pungsod ang makabaton sang pondo para sa SBDP.
Pahayag niya nga nakumpleto sang DILG 12 kag JRTF-ELCAC 12 ang endorsement sang mga ginaplano nga proyekto sang Marso 31.
Dugang pa niya nga ang tig P20 million nga SBDP Fund ang daku nga bulig sa mga barangay sa rehiyon nga may-yara lamang sang P1 million tubtob P2 million nga internal revenue allotment.
Nagalab-ot naman sa 206 ka mga proyekto sa rehiyon dose ang na-proposed sa idalom sang LGSF-SBDP lakip dire ang upgrading, rehabilitation kag concreting sang farm-to-market roads kag expansion sang potable water systems.
