64 anyos na magtutudlo nadasmag-patay sa Payawan 1, Brgy. Luna, Surigao City

Tagkilaya an biktima na si Susan Besiete Yee, 64 anyos, isa ka magtutudlo ug residente sa Macresia Village, Brgy. Luna sakop sa siyudad. Sa inisyal na imbestigasyon nan PNP, kaiban nan magtutudlo an bana na si Mercedario Sia Yee, 62 anyos, sakay sila nan motorsiklo ug aksidente na nabangga nan isa ka Isuzu elf na may plate no. GNR184, tagmaneho ni Joselito Benedicto Lisondra, 41 anyos, minyo ug residente sa Sitio Toril, Brgy. Luna, Surigao City. Nadaya pa an magtiayon sa Caraga Regional Hospital pero namatay si Susan Yee samtang an bana an padajon na tag-admit sa amo na hospital. An driver sa elf na si Lisondra an jaon na sa kustodiya nan City PNP ug tagtakda sang-atan nan kasong Reckless Imprudence Resulting to Homicide. Kon kahinumduman, ini na an ikaduha na disgrasya na mitumaw sa Payawan 1, dapit sa gasolinahan, adton milabay na semana namatay isab an magtiayon na sila Jhunrey ug Genipher Labandero sa dihang an tricycle na tagsakyan an nawad-an nan break ug midasmag sa isa ka truck na nagpa-gasolina.