652 loose firearms ya presenta con Duterte na sulu

22

Zamboanga City-Ta alcansa na 652 maga alta kalibre armas de fuego el ya rindi conel militar el maga politico desde na disi nueve municipalidad que ta composite el 410 maga barangay na entero provincial de Sulu desdel 2017 .

Ya presenta el mismo Commandante del Western Mindanao Command Lt.General Carlito Galvez iho , con maga armas de fuego na Presidente del Pais Rodrigo Roa Duterte , y lo mismo con setentai seis maga miembros del grupo Abu Sayyaf quien tambien ya rindi na militar desdel pasao anyo.

Na mensahe di Duterte ya habla este que nuay le rabio con el grupo Abu Sayyaf , donde ya asegura le cunestos maga ya man surrender que beneficia conel programa de govierno como el livelihood y kasa , donde ya introduci le conel Secretaryo de Tesda quien implementa el programa para el livelihood con maga rebelde ya man surrender .
disi seis desde na 76 mga surrenderees el na lista del order of battle del militar y tiene mandamiento de aresto .

Mientrastanto , el maga armas de fuego ya presenta conel Presidente Duterte segun con el Komandante del Joint Task Force Sulu Brigadier General Cirilito Sobejana dies porciento lang desde conel maga “loose firearms” que ta prolifera na Provincia de Sulu , tiene pa segun sila nobenta porciento para trabaha mucho y convinci con maga opisyal incluhido ordinaryo persona para rindi con diila armas de fuego , pero ta ase sila este con diplomacia .

Si Sobejana ya habla , el proliferacion de maga “Loose Firearms “ amo el razon con el frequente incidente de tiro ta ocuri na provincial , donde ta estima le que ta alcansa pa na ocho mil dos cientos armas de fuego que debe rindi na diila poder.


Facebook Comments