Nag-negatibo sa paggamit ug iligal nga droga ang mokabat sa 6 mil ka mga police personnel sa Police Regional Office (PRO-12) atol sa gihimong sunod sunod nga supresang drug testing nga nagsugod niadtong bulan sa Disyembre 2020.
Matud ni PRO-12 Director Brigadier General Michael John Dubria, kini ang base sa consolidated report nga gisubmitar sa Regional Crime Laboratory subay sa mandatory drug tests nga gimando niini.
Samtang magpadayon ang testing sa kapin usa pa ka libo nga nahibilin nga mga police personnel gikan sa nagkadaiyang unit sa Rehiyon.
Dugang pa ni Dubria nga 6 mil gikan sa 7 mil ka mga personnel ang nag-negatibo ug gilauman niya nga mag negatibo gihapon ang resulta hangtud nga makumpleto ang proseso.
Sakop sa drug test nga kabahin sa internal cleansing program sa Philippine National Police (PNP) ang commissioned ug non-commissioned police officers, ingon man ang mga non-uniformed personnel ilawom sa PRO-12 ug support units.
Prayoridad sa region-wide testing ang top officials ug mga miyembro sa drug enforcement units gikan sa regional ngadto na sa precinct levels.
