CAPIZ – Aprubado sa guinpatigayon nga sinapol ang Provincial Development Council Meeting sa pagpanguna ni Governor Tony del Rosario ang kapin sa syete bilyones pesos nga Annual investment Program (AIP) para sa mga nakalinyada nga programa kag proyekto sang gobierno probinsyal para sa tuig 2018. Ang nasambit nga meeting ang guintambungan sang municipal mayors sa kabanwahanan kag non governmental organization nga lunsay mga katapo sang PDC. Pila sa mga nagapanguna nga guintalakay amo ang guinpreparar nga budget para sa nagkalailain nga programa kag proyekto sa madason nga tuig. Basi sa guin aprubahan nga pondo sang konseho ang pondo para sa madasun nga tuig sa bahin sang General fund may total nga 1,178,530,044.00, 20% development fund-244,420,750.00, Special Education Fund-10,500,000.00, Calamity Fund,-79,426,330.00, Gender and Development- 79,426,330.00, kag ang External Source fund nga magahalin sa nagkalailain nga national agencies nga magahatag sang proyekto sa Capiz nga naglab-ot sa 5,896,403,178,67 nga may total sa pangkabilugan nga 7,488,706,632.67 pesos. Guinpaseguro ni Governor Tony del Rosario nga mapatuman sa madali nga panahon ang mga proyekto ilabi na sa kabanwahanan nga guinpainan sang pondo tungod nagapati siya nga makahatag ini sang kasulhayan sa pagpangabuhi sang Capiznon. Nagpasalamat naman ang mga Municipal Mayors sa kabanwahanan sa gobierno probinsyal sang Capiz sa mga proyekto nga igahatag sa ila nasakupan nga lugar. Nalakip lang sa mga programa nga guinpondohan sang Annual Investment Program amo ang sa bahin General Public Services, Social Services, Hospital Services, Economic Services kag Other Services.
(c) Capiz Aksyon News Center
