General Santos City- Patay ang usa ka batang lalake human matud pang nalumos sa usa ka beach resort nga nahimutang sa Brgy Bawing ning dakbayan sa Gensan.
Ang biktima nailang si Jorence Victoriano Faisahe, syete anyos nga residente sa Brgy Conception Koronadal South Cotabato.
Sumala ni SPO1 Arnold Solano sa Tambler Police Station, alas 7:00 sa gabii nakit-ang wala nay malay ang bata samtang anaa sa London Beach Resort.
Gidala pa kini sa ospital sa may Brgy Calumpang apan gideklara kining dead on arrival.
Dugang pamahayag ni SPO1 Solano nga uban ang pamilya sa batang si Jorence ug mga silingan nga taga Koronadal apan wala nabantaye nga nalumos na diay ang nahisgutan.
Ulahing nakit-an ang bata nga naligo sa dagat ug nagduladula uban ang ubang mga bata apan kurat na lamang ang mga ginikanan dihang nabantayan nga nalumos na kini.
Wala pay pahayag karon ang pamunuan sa London Beach Resort samtang ang patayng lawas sa biktima ang gikatakdang pagadad-on sa pamilya ngadto na sa ilang lugar sa Koronadal South Cotabato. ( RadyoMan Jordan Britos)
