General Santos City—sikop sa gihimong anti-narcotic operation sa hiniusang pwersa sa Philippine Drug Enforcement Agency (PDEA) Regional Office -12 ilawom sa superbisyon ni Director Gil Cesario Castro, Provincial Drug Enforcement Unit (PDEU)-Sarangani Province ug Malungon Municipal Police Station ang usa ka Van Driver nga gikaingong miyembro sa Drug group nga naglihukan sa Sarangani Province sa may Purok Waling-Waling, Barangay Malandag, Malungon.
Giila ang suspek nga si Almer Constantino y Suriga*, *26, residenti sa samang lugar. Alas 12:00 pasado sa kabuntagon, July 6, 2017 gihimo ang Buy-bust operation sa panimalay mismo sa suspek.
Samtang gihimo na ang transaksyon nakamatikod ang suspek nga mga miyembro sa otoridad ang iyang kaestorya maong kini midagan padulong sa likod nga bahin sa ilang panimalay.
Wala na madakpan pa ang suspek human nga paspas nga nakasibat. Narekober gikan sa suspek ang (1) ka transparent plastic sachet sa shabu nga anaa sa (5) ka gramo nga gibana-banaang nagkantidad ug P 25,000.00.
Human sa 30 minutos, gi-served sa otoridad ang Search Warrant sa panimalay sa nahisgutan. Atol sa operasyon nakakuha ug (2) ka sachets sa gikatahapang shabu ang mga personahe sa kapulisan ug PDEA nga dunay timbang nga (10) ka gramo nga dunay estimated value nga P50,000.00.
Kasong paglapas sa Section 5 (Sale of Dangerous Drugs) ug Section 11 (Possession of Dangerous Drugs) sa Article II ilawom sa Republic Act 9165 (The Comprehensive Dangerous Drugs Act of 2002) ang gikatakdang ipasang-at batok sa suspek kansa padayong at large karong panahuna.
