Davao City- Naalarma ang katawhan sa Malita, Davao Occidental human nga adunay bata nga 8 anyos nga gitago lang sa ngalan alyas Roy human namatay sa sakit sa gituuhang Meningococcemia kaniadtong adlawng Sabado.
Sa report gikan sa Malita District Hospital, alas 2 sa kaadlawon gidala ang maong bata ug gideklara sa mga attending physician nga gituuhang meningococcemia ang hinungdan.
Daling gikuha sa tagtungod ang bata apan wala napaembalsamar gumikan kay walay mudawat nga punenarya tugod delikado ang maong sakit sanglit sumala pa makatakod kini.
Samtang ang mga silingan sa biktima daling nanginom og tambal, nagpacheck up ug nagpakuha dayon og dugo aron masiguro nga luwas ug dili sila matakdan sa maong matang sa sakit ug negatibo ang resulta niini.
Gikadismaya usab sa tagtungod sa bata subay sa pakighinabi sa usa ka lola sa biktima nga si alyas Som nga maoy nagdala sa iyang apo ngadto sa nahisgutang hospital ug iyang gireklamo ang mga nurse nga wala gidali pag atiman ug wala man daw kuhai og dugo ang iyang apo aron mabal-an kun tinuod ba nga meningococcemia ang sakit sa iyang apo hinungdan nga lisod nadawat sa mga kabanay ang hinanaling kamatayon sa maong bata.
Sa pakighinabi usab sa RMN DXDC Davao team sa usa sa mga nurse sa maong Hospital nga si Kim, sumala niya nga giatiman ang maong pasyente apan suspected lamang nga minengococcemia ang sakit sa bata subay usab sa pamahayag ni Dra. Bungcato.
Ang tagtungod sa bata nagplano karon nga mukiha og kaso batok sa mga personahe sa Malita District Hospital samtang ang patayng lawas sa bata daling gipahiluna ug gilubong pagkahapon.
Radyoman Don Pulayao
