Walo ka mga pares sa Sitio Traan Leteng, Barangay Kematu, T’Boli ang tigayon nga ginkasal sa kasalan sa Sitio nga ginpatigayon sang Provincial Government sang South Cotabato kag LGU T’Boli kabahin sang launching sang convergence program for poverty reduction sang probinsya.
Ang nasambit nga 8 ka pares ang halos naglive-in sang pila ka tuig kag may mga kabataan na.
Kapigaduhon naman suno pa ang rason kon ngaa wala nakasal ang mga ini amo nga hugot ang ila pagpasalamat sa lokal nga panggobyerno sang T`boli kag South Cotabato.
Ginlibre naman sang LGU T’Boli ang gasto sa cenomar sang mga ginkasal kag tanan nga requirements, samtang sa pagkaon, cake kag dekorasyon sa reception naman ang ginsabat sang provincial government kag ang wedding rings sang mga ini ang ginsponsoran sang PEMO.
Suno kay Provincial Population Officer Zenaida Duron nga 27 kuntani ka pares ang kaslon, apang 8 lamang ang tigayon nga nakasal bangud sa kapaslawan sang mga ini nga macomply ang mga kinahanglan nga requirements kapareho sang birth certificate.
Gin-ako man ni Maam Duron nga problema sa gihapon sa mga IP communities ang wala sang birth certificate rason nga ini suno pa ang ginatinguhaan nila nga maaddress.
