Nagmalampuson ang gihimong medical mission sa RMN DXMB Malaybalay kagahapong adlawa sa Barangay Linabo ning siyudad.
Anaa sa sobra 800 ang nakapahimulos sa mga libreng serbisyong gitanyag sa RMN Malaybalay.
Mukabat sa 85 ang nakapahimulos sa libreng masahe, 111 kapin ang nakapahimulos sa libreng ibot sa ngipon, 280 ang nakapahimulos sa libreng medical check-up, 14 ang nagdonar sa ilang dugo, 391 ang nakadawat ug libreng tambal ug 300 kapin ang nakadawat ug libreng unique toothpaste ug Shield Bath soap nga gikan sa ACS manufacturing corporation.
Ang mga nakapahimulos gikan sa nagkadaiyang barangay sa Basakan District ning dakbayan sa Malaybalay.
Nagsugod ang kalihukan sa alas 9 sa buntag hangtud alas 3 sa hapon sa Covered Court, sa Barangay Linabo gahapon.
Ang mao nga medical mission nagmalampuson tungod sa tabang sa RMN Foundation, Tatak RMN Fans Club, Inc. 648 online fans, Tatak Tisoy Marketing, Barangay Konseho sa Linabo, Malaybalay City, ACS, Philippine Red Cross Bukidnon Chapter ug sa mga suking tigpaminawan sa RMN DXMB Malaybalay nga naghatag ug cash nga ang tumong ug tinguha mao ang pagserbisyo sa katawhan.
Nangayo usab ug despensa si RMN DXMB Station Manager Richard Villaronte sa mga pipila ka mga katawhan nga wala nakapahimulos sa mao nga libreng serbisyo ug wala na-satisfy.
Pasabot niini nga limitado lamang ang resources ug dili unlimited hinungdan dili tanan ang maserbisyuhan.
Nagpasalamat usab ang tibook puwersa sa RMN Malaybalay sa mga tawong nagpaluyo ug nitabang alang sa kalampusan sa mao nga medical mission.
Ang maong akbitidad alayon sa ika-67 nga anibersaryo sa Radio Mindanao Network kon RMN kagahapong adlawa.
