Mukabat sa 844 ka mga Certificates of Land Ownership Award kon CLOA Titles ang gi-apod-apod kagahapong adlawa atol sa ika-105th nga founding anniversary sa probinsa sa Bukidnon.
Sa interview sa RMN Malaybalay ngadto kang Hansel Echavez, ang administrative officer sa Public Affairs and Information Assistance sa Provincial Government of Bukidnon gibutyag niini nga duha ka mga departamento ang nanguna sa mao nga pag-apod-apod sa handog titulo nga mao ang DENR ug DAR.
Matud ni Echavez nga sa DAR, mukabat sa 444 ka mga CLOA titles ang gihatag nga mukabat kini sa 583.1625 ka ektaryas nga gikan sa mga lungsod sa Dangcagan, Kitaotao, Malaybalay City, Impasug-ong, Valencia City ug Sumilao.
Samtang sa DENR, mukabat sa 400 ka mga CLOA titles nga nagkober kini ngadto sa 364. 2855 ka ektaryas nga gilangkuban kini ilawom sa CENRO Valencia, CENRO Don Carlos ug CENRO Talakag ug Manolo Fortich.
Samtang dismayado usab si Governor Jose Maria R. Zubiri Jr. sa NCIP – Bukidnon tungod kay wala kini nakahimo ug pag-apod-apod ug CADT ngadto sa mga lumad sa probinsiya.
