Bukidnon – Giklaro sa 8th Infantry Dependable Batallion nga walay namatay nga sundalo human gisulong sa rebeldeng New People’s Army o NPA ang duha ka army detachments sa lungsod sa Barangay Calabugao, Impasug-ong, Bukidnon.
Sa interview sa RMN Malaybalay ngadto kang 1Lt Erwin Bugarin, spokesperson sa 8th IB gibutyag niini nga nagkasinukliay sa mga bala ang mga sundalo batok sa mga rebelde niadtong Biyernes nga miluntad sa pipila ka gutlo.
Matud ni Bugarin nga ang nag-unang tumong unta sa mao nga duha ka detachment mao ang paghatag ug seguridad ug sa mga katawhan sa mao nga dapit.
Sa karon nagpadala na matud pa ug reinforcement ang 4th ID,Philippine Army aron sa paggukod sa mga NPA.
Una nang gipahayag usab ni Ka. Malem Mabini, tigpamaba, NPA-NCMR nga tulo ka aksyong militar ang dungan nga gilunsad sa mga pwersa sa Eastern Misamis Oriental – Northeastern Bukidnon Sub-Regional Command (EMONEB-SRC) – New People’s Army.
Ang usa nahimutang sa KM30, Brgy. Calabugao, kung asa ilang gireyd.
Ang ikaduha, mao ang gilunsad nga harasment sa mga NPA ngadto sa laing CAA Patrol Base sa Brgy. Hagpa, Impasug-ong. Ang ikatulo mao ang pagdis-arma sa usa ka security guard sa opisina sa National Greening Program didto sa Sitio Bagaay, Brgy. Calabugao kung asa nakuha matud pa nila ang usa ka ripleng carbine.
