SAGAY CITY – (Developing Story) Siyam ang patay matapos nga ini ang pinangtiro kag ang iban pinangsunog pa sa Purok Firetree, Barangay Bulanon, syudad sang Sagay.
Natabo ang insedente kagab-i mga pasado las 9 sa diin ang mga ini ang nagposisyon sa masobra 100 ektarya nga duta nga ginapanag-iyahan ni Mrs. Carmina Tolentino kag naka-arendo ini.
Biyernes, Oktubre 19 sang natapos na harvest sang tag-iya ang mga tubo nga pinangtanom kag pagka-Sabado sang aga, Oktubre 20, didto na nagsulod ang mas o menos 30 ka mga katapo sang National Federation of Sugarcane Workers (NFSW) sa lugar kag nagpahamtang sang tulda.
Suno kay Danilo Tabura, para legal officer sang NFSW, may Notice of Coverage na ang duta rasun nga ginposisyunan ini sang ila mga miembro kag mangunguma.
CRIME SCENE Ang Hacienda Nene, ang mas o menos 12 kilometros halin sa Poblacion sang syudad sang Sagay sa diin suludlon pa ini sang mga 600 metros halin sa proper sang Barangay Bulanon.
Sabado sang aga sang nagpatindog sang tulda ang 30 ka mga tawo bilang kabahin sang ila lihok. Gin-organize ini sang nagpakilala NFSW member nga si Boy Maglangit sang Barangay Plaridel, Sagay City.
Sang gab-i na, sa 30, 13 nalang ang nabilin. Ang 11 ang ara sa sulod sang tulda, may isa nga nagguwa, may isa nga nagcharge sang cellphone sa malapit na balay, kag may isa naman nga nag-attain sang iya personal necessity.
Sa imbestigayon sang kapulisan paagi kay PCInsp. Robert Mansueto mga las 9:45 sang gab-i natabo ang kremin sa diin ginapatihan mga lima tubtob pito ka tawo nga mga nakabonet ang nagpangtiro sa mga biktima.
Sa 11 nga ara sa tulda, may isa nga nakapalagyo samtang may isa nga nakasurvive bangod kay nagpanago sa sako sang bugas.
Anum ka mga patay nga lawas ang nakit-an sa sulod sang tulda samtang tatlo naman ang sa guwa nga naghana pa kon tani nga magdalagan sang naglinukpanay. Halos mga biktima ang may igo sang bala sa ulo kag may iban pa nga ginbubu-an sang gasolina kag ginsendihan.
RECOVERIES Narecover sang mga Sagay PNP ang isa ka .38 nga rebolber nga nakalupok sa crime scene sa diin posibli ginapanag-iyahan sang isa sa mga napatay. May ara man bala sang shotgun sa bulsa sang isa ka napatay. Narecover man sang kapulisan ang pito ka baseyo sang kalibre .45 nga pistola lakip man dose ka baseyo sang armalite nga ila posibli sang mga assailants.
VICTIMS Ang mga biktima kalabanan pinang-recruit lang sang NFSW para posisyunan ang amu nga duta sa pagpati nga may parti ang mga ini sa tion nga mahatag na sang gobyerno sa mga benepisaryo.
Kaangay sang istorya sa dyHB sang iloy ni Jomarie Ugyahon, 16 anyos, sang Purok Cesco, Barangay Rafaela Barrera, nahagaran lang ini nga magpadulong sa lugar sang amu nga adlaw. Si Jomarie, suksok ang iya No. 4 nga short pangbasketball ang naga-eskwela pa kag nag-upod gid lamang sa tiyo sini nga pakaisa sang iya bana. Ang iya amay ang driver sang Ceres. Patal nga pilas sa ulo ang naagom ni Jomarie.
Magluwas sa igo sang bala, sunog naman ang pila ka bahin sang lawas nanday Morena Mendoza, 49 anyos sang Sitio Lansones; Marcelina Dumaguit, 56 kag Rannel Bantigue, 41 sa Barangay Plaridel.
Patay man ang maglive-in nga sanday Eglicerio Villegas, 36, kag Angelife Arsena, 47, tanan sang Barangay Bulanon.
Patal man nga igo sang bala ang naagom nanday Paterno Baron, 48; Rene Laurencio, Sr., 53, sang Barangay Plaridel kag ang 17 anyos nga si Marchtel Sumicad, sang Purok Mahogany.
POLICE PROCEDURE Suno kay PSSupt. Rodolfo Castil, ang Provincial Director sang Negros Occidental Provincial Police Office, nga ipaidalom sa paraffin test ang tanan nga mga biktima para mahibaluan kon bala may ara gid man sang exchange-of-fire.
May persons of interest na sila apang indi niya pa mapalayag sa publiko bangod nagapadayon pa ang imbestigayon sang Sagay PNP.
Pahayag naman ni PCInsp. Mansueto nga nagpanawag sa ila ang bata ni Mrs. Carmina Tolentino kag handa man nga magbulig sa mga otoridad sa nagapadayon nga pagpangusisa.
