Na-promote sa taas nga ranggo pinaagi sa Special Promotion Order nga gipirmahan ni PNP Police Dir. Chief Ronald Dela Rosa, ang 98 ka mga personahe sa Police Regional Office kon PRO-10.
Ang paghatag promotion gipahigayon sa National Headquarters sa Camp Crame niadtong Pebrero singko ning tuiga, atol sa ilang regular flag raising ceremony.
Nasayran nga giaprobahan ni Gen. Dela Rosa ang meritorious promotions sa 90 ka Joint Task Group PNP sa PRO-10, gumikan sa ilang talagsaong kaisog nga naghimong gawasnon sa Marawi City batok sa mga teroristang Maute-ISIS niadtong October 2017.
Samtang……
Naglakip usab sa mga gihatagan sa special promotion ang walo ka mga personahe sa Binuangan Municipal Police Station, kinsa nakiggubat sa mga teroristang New Peoples Army niadtong December 3, 2017.
Mahinumdoman, nga maisugong gidepensahan sa kapolisan sa Binuangan PNP ang ilang buhatan batok sa 200 ka mga rebelde niadtong higayona, kinsa misulong sa maong istasyon nga miangol sa pipila ka duty police personel.
Tungod niini, gipaabot ni PNP-10 regional director Chief Supt. Timoteo Pacleb ang iyang mainitong pagpasalamat ug pagsaludar ngadto sa mga bag-ong na-promote nga mga personahe sa PRO-10 gumikan sa ilang kaisog ug kabayanihon.
