BACOLOD CITY – Wala sang lamod pulitika. Ini ang matigdas nga pahayag ni Abang-Lingkod Party-List Representative Stephen ‘Karaps’ Paduano matapos nga nagpatigayon sang Christmas kag New Year’s celebration kagab-i sa Bacolod Pavillon Hotel.
Suno kay Paduano nga welcome gid ang tanan nga mga opisyales sang barangay sa syudad sang Bacolod bisan pa nagikan sa MKK ukon Grupo Progreso bangod ang ini nga pagtipon-tipon ang ila na naandan sa Third District sa pagpanguna ni Congressman Albee Benitez.
Para ka Paduano, tatlo na nila katuig ini ginapatigayon kag kun pulitika ang hambalan, tuman pa ini ka temprano para sa 2019 nga election.
Wala pa sang kasiguraduhan kun ano nga posisyon ang iya padalaganan Bacolod, Mayor bala ukon Congressman ukon mahimo man sya man nga magabalik sa Abang Lingkod bilang Party-list Representative.
Nagtambong sa kahiwatan sanday former Mayor Joy Valdez, kag Mayor Monico Puentevella subong man si Councilor Ricardo ‘Cano’ Tan, Councilor Kalaw Puentevella, Mayor Bebot Miravalles sang Valladolid kag Mayor Andrew Montelibano sang Murcia.
Ara man ang presensya sang pila ka mga pangontra sang Grupo Progreso nga sanday former Councilor Homer Bais kag 2016 congressional candidate, former Vice-Mayor Thaddy Sayson.
Basi sa record nga subong nga tuig ang may pinakadamo nga nagtambong sa diin nakarecord ini sang 1,400 kumpara sa nagligad nga mga tinuig nga 800 tubtob 900 gid lamang ang nagkadto.
Samtang may yara naman sang 35 ka mga barangay kapitan gikan sa nagkalain lain nga barangay sa syudad sang Bacolod ang present. /Grace Supe photo
