BACOLOD CITY – Ginahulat sa karon sang Liga ng mga Barangay sa ciudad sang Bacolod ang official notice angut sa nangin statement ni Pres. Rodrigo Duterte nga may barangay kapitan sa Bacolod nga involved sa illegal nga druga.
Suno kay ABC President, Coun. Lady Gles Gonzales sa interview sang DYHB nga bisan siya ang nasorpresa sa pahayag sang pangulo sang ini ang nagtambong sa Masskara celebration sang Bacolod sang nagligad nga Sabado, Octubre 27.
Ginsiling ni Gonzales nga nakibot siya sang naghambal si Duterte nga “dapat magbiya na sa Bacolod ang ini nga barangay kapitan nga iya ginasiling imbulbado sa illegal drugs kag magkadto na lamang sa Spratlys.”
Pahayag sang ABC president nga wala siya sang idea sa ginatumod sang pangulo bangud nga wala man natawag sang PDEA ukon sang DILG nga nagcall sang iya atensyon nga may yara gid man sang na-validate nga barangay kapitan nga involved sa amo nga aktibidad.
Ginaklaro niya nga aktibo ang Liga ng mga Barangay sa Bacolod sa ila Barangay Anti-Drug Abuse Council ukon BADAC gani daku na lamang ang iya kakibot sa mensahe sang pangulo.
Angut sini, ginpahayag ni Gonzales nga apesar wala siya sang personal knowledge sa kon sin-o nga barangay kapitan ang ginatumod sang pangulo sa gihapon ang tagsa ka barangay ang may ginahimo nga mga tikang sa kon paano i-address ang amo nga problema./dyHB BACOLOD
