Nagpanugyan ang kilala nga abogado sa ciudad sang Bacolod sa mga Kongresista nga magkonsulta man sa ila mga constituents kun sila ang mag-boto sa mga hagna ilabi na ang mga makaapekto sa kadamuan.
Ini ang pahayag sa DYHB ni Atty. Cesar Beloria, Jr. kasunod sang kontrobersyal karun nga House Bill (HB) No. 6875 ukon ang proposed Anti-Terrorism Act of 2020. Suno kay Atty. Beloria, mas maayo kuntani kon ginapa-instsindi sang mga mamalidha sa ila nasakupan ang kaundan sang mga hagna nga ila ginahimo kag ginaduso bangud kabahin ini sang ila obligasyon.
Nahibaluan nga ang Anti-Terror Bill ang igabulos sa Human Security Act of 2007, nga amo karun ang anti-terror law sa pungsod. Tinutuyo sang amo nga hagna nga pabakuron pa ang kasuguan batok terorismo. Sa idalom sang anti-terror bill, gina-define ang terorismo bilang kahimuan nga nagatuyo nga magtuga sang kamatayon ukon injury sa tawo kag halit sa propiedad ukon infrastructure. Kalakip naman diri ang pag-enganyo sa iban nga maghimo sang terorismo.
Samtang, ginpahayag ni Atty. Beloria nga ang pagpasar sang Anti-terror bill ang may kaangtanan sa pagpangutang sang Pilipinas. Suno diri, ang pagpasar sang hagna nga mangin kasuguan na kon pirmahanin ni Presidente Rodrigo Duterte, ang pagsunod sa lebel sang iban nga nasyon sa diin isa sa mga kondisyones sang mga international organizations ilabi na ang mga nagapautang sa Pilipinas.
[image: image.png]
