Davao City – Gilauman sa kanhi Professor sa Ateneo De Davao University nga dili makasinati og problema ang pagsugod sa klase diin ipatuman ang new blended learning karong adlawa, October 5, 2020 sa pampublikong mga tulunghaan.
Niini, nanghinaut si kanhi ADDU Professor ug karon Barangay 76-A Kagawad Randy Ponteras nga mahatag sa mga telecommunication companies ang klaro ug nindot nga signal sa internet nga gikinahanglan aron dili maputol ug madisturbo ang pag-atender sa klase sa mga estudyante sa online.
Positibo usab si Kagawad Ponteras nga hitsas ug plastada na ang mga modules nga gipang-apod-apod sa Department of Education sa mga kabataan sa tibuok nasud.
Ang dugang panghinaut sa kanhi Educator nga masabtan og maayo sa mga ginikanan, sa mga pamilya ang pagagamiton nga mga modules isip sila maoy gitahasan nga muhimo sa responsibilidad sa pag-edukar kon pagtudlo sa ilang mga anak ug mga manghod karon nga sa balay lang himoon ang klase.
Masaligon usab ang kanhi Educator sa kapasidad sa mga magtutudlo sa mga pampublikong tulonghaan tungod sa pila ka buwan nga mga pagbansay ug paghasa nga gibuhat sa DepEd kanila may kalabotan sa modules ug online class.
Aminado ang Kagawad nga dili pa siya makasulti kon matagbo ba gayod sa mga magtutudlo ang kalidad sa edukasyon nga giikspektar sa tanan karon nga gipaagi sa bag-ong sistema ang pagpanudlo dili sama sa naandan nga pisikal nga klase.
RadyoMaN Joel Viray
