Maga otoridad ya recubri con Edmond Ramos enante madrogada na isla serca na barangay Tapiantana, Tabuanlasa, Basilan.
Na exclusivo report del RMN Zamboanga ta aparese con Ramos ya man salapu el maga militar banda ala una del aga y dayun ya lleva na mas serca hospital seguiendo conel proceso cadavez ta recubri victima de kidnapping.
Si Ramos amo el aca sais Zamboangueño construction worker quien ya puede libra na mano del Abu Sayyaf Group na Patikul despues canila ya abducta del Julio 15 en este año.
Grande pregunta ahora si quemanera ya guinda si Ramos na Basilan desde na Sulu.
Acordando, el hora ya hala canila el maga ASG desde na diila barracks in Sulu, dos dayun del diila uban ya puede escapa y estos canda Larry Velasquez y Jenly Miranda.
Mientras canda Felimon Guerrero, Jayson Baylosis y Joel Adanza alegaomente ya puede escap del Hueves amediante el ultimatum ya dale el maga cautor. — Dan Toribio
