Davao City – Giangkon ni Davao City First District Councilor Mabel Sunga-Acosta nga dili kini ganahan og binuang kun jokes nga dunay sagol nga malaw-ay nga ipasabot sama sa sekswal nga aspeto.
Anaa man o walay reaksiyon ang United Nations (UN) labot sa usa ka pagtoon nga ang mga Pilipino maglisod og wagtang sa pagsulti og lawasnong binuang, dili gayod ganahan mamati og sex jokes ang konsehala.
Bisan tuod og gihimong lugar sa kinataw-anay sa magbarkada ang sex jokes apan isip Kristohanong nasud, dili gihapon maayo ang binuang nga bastos kay makahugaw kini sa hunahuna sa tawong makabati sa istorya.
Nanghinaut si Acosta nga unta muabot ang panahon nga mawala sa batasan sa Pinoy ang pagbangka og sex jokes aron ang world community mausab ang tan-aw sa katawhang Pilipino.
Dili man ganahan si Acosta sa sex jokes apan gilabanan niini si Pres. Rodrigo Duterte sa pagsulti og malaw-ay nga binuang sa katarongan nga mas nakaila man ang mga Dabawenyo sa presidente itandi sa mga taga kaulohan.
Alang sa konsehala, kung aduna ma’y angay hinumdoman kang Duterte, kana dili ang mga sex jokes apan kadtong iyang mga nahimo alang sa nasud sulod sa kapin tulo ka tuig nga anaa kini sa pagpanerbisyo sa katawhang Pilipino.
RadyoMaN Joel Viray
