Gikondena sa Alliance for Concern Teachers kon ACT Teachers ang pagpusil sa ilang miyembro sa Lumbayao, Valencia City, kagahapong adlawa.
Matud sa ACT Teacher nga si Zhaydee usa ka outstanding teacher awardee sa mao nga barangay ug usa ka aktibo nga miyembro sa Alliance of Concerned Teachers – Region X.
Nasayran nga gipusil sa iyang tiil ug dughan ang magtutudlong si Zhaydee Cabanyelles, 32, samtang anaa na kini sa tulunghaan sa Dalit Elementary School, Lumabayo, Valencia City, Bukidnon alas 8 kaping kon kulang sa buntag.
Nasayran nga nag-andam unta kini para sa klase ang biktima ug kalit nga adunay tawo nga nakabunit ang nangita kaniya ug sa iyang bana nga maestro nga nagtudlo usab sa mao nga tulunghaan.
Human sa mao nga pagpamusil daling nisibat ang mga suspek sakay sa duha ka mga motorsiklo.
Subay sa police blotter sa Valencia City PNP, gi-alegarang usa ka miyembro sa New Peoples Army kon NPA ang amahan sa maestra ug gitumbok nga gituhoang NPA ang anaa sa likod sa pagpamusil.
Apan sa interview sa RMN Malaybalay ngadto kang Zaldy Bitago, ang amahan sa maestra nga gipusil, gihimakak ninii ang pasangil nga siya miyembro sa NPA.
Matud ni Zaldy nga ang tinood usa siya ka miyembro sa KASAMA Bukidnon – Valencia City Chapter kaniadto apan dili siya miyembro sa NPA.
Gi-angkon usab niya nga apil siya sa mga lihok protesta nga gihimo kaniadto ug nahimong facilitator sa mga yango-ngo sa mga mag-uuma.
Saysay pa niini nga nihawa na sila karon sa Bukidnon ug atoa na sa Visayas nanginabuhi.
Daan na matud pa siya nakadawat ug hulga sa kinabuhi.
Nanawagan usab kini ug hustisya sa nahitabo sa iyang anak. Sa karon anaa na sa stable nga kahimtang ang maong biktima.
