BACOLOD CITY – Ginahibalo na sang Department of Agriculture (DA) ang actual expenses sang pag-transport sang baboy halin sa Negros Occidental pakadto sa Luzon. Sa interview sang DYHB kay Provincial Veterinarian Renante Decena, ginkumpirmar sini nga nagtawag na ang national office sang DA sa Region 6 agod nga hibaluon ang ginagasto sang mga traders sang baboy pakadto sa Luzon.
Nahibaluan nga subong nga adlaw, epektibo na ang price cap sa karne sang baboy kag manok sa mga merkado sa Metro Manila. Santo sa Esxecutive Order No. 124 nga ginpirmahan ni Presidente Rodrigo Duterte, sa sulod sang 60 ka adlaw, ang kada kilo sang pork shoulder ang dapat nga P270 ang kilo, samtang ang pork belly kag liempo yara sa P300 per kilo, kag ang manok tag-P160 ang kilo.
Diri sa ciudad sang Bacolod partikular na sa Burgos Public Market, kon karne sang baboy ang hambalan sulod sa price cap ang presyuhanay bangod ang isa ka kilo ang nagadangat lang sa P250 kag ang liempo yara naman sa P260 per kilo. Apang mas mahal na ini bangod sang nakaligad nga semana, yara lang sa P220 ang kilo sang karne sang baboy. Ang karne sang baka naman yara sa P300 ang kilo. Apang ang manok mas mahal sangsa sa price ceiling sa Metro Manila, bangod ang isa ka kilo yara sa P180, samtang ang chicken feet tag-P90 per kilo; P210 ang atay: P160 ang baticolon kag P190 naman ang pecho kag paa.
[image: image.png]
