Davao City – Igmat kaayo ang Eastern Mindanao Command sa ilang tubag sa pangutana kung nalipay ba sila o dili ba kaha maayo nga katikaran alang kanila ang pag-detain kang Satur Ocampo ug Act Representative France Castro human naharang sa PNP checkpoint ang ilang convoy ug pagdala og 14 ka minors sa lungsod sa Talaingod, Davao del Norte alas-10:00 sa miaging gabii.
Wala nagpabitik si Eastmincom Spokesperson Lt. Col. Ezra Balagtey diin nagbantay kini sa pagsanong ug pagtubag sa mga mga pagsukitsukit sa STP Investigative Team kaniya kung unsay ilang masulti sa pag-detain kang Ocampo ug sa iyang grupo.
Masabtan nga dili buot ni Balagtey nga masayop og buhi og mga mga pulong nga posibling magpahaling sa kasuko sa mga militante nga kaalyado ni Ocampo ug ang kasundalohan maoy buthan sa mga isyu la-bot sa pagkaditinar sa grupo sa kanhi magbabalaod.
Hinoon gipaambit ni Balagtey ang iyang mga nasayran gikan sa mga pulis sa lungsod sa Talaingod mahitungod sa ilang tratamiento sa pagdala og mga bata sa grupo sa usa sa mga tag-as nga lider sa makawal-hong grupo.
Segun sa opisyal nga ang pagbiyahe ni Ocampo sa 14 ka mga bata usa ka matang sa exploitation ug abuso ug kuwalipikado kini alang sa pagsang-at og kaso batok kang Ocampo.
Busa alang sa tigpamaba sa kasundalohan, angay atubangon ni Ocampo ug sa iyang mga kaubanan ang mga kaso ug sa korte na nila pamatud-an nga sila inosente sa pasangil nga gibato kanila.
Sumpay ni Balagtey nga ang pagharang sa convoy ni Ocampo pagpakita lamang nga walay puwedeng mulabaw sa balaud bisan pa man og kanhi pa kini nga kongresista sa nasud.
RadyoMaN Joel Viray
