Suportado sa Armed Forces of the Philippines (AFP) ug New Peoples Army (NPA) ang pahayag ni Pangulong Rodrigo Duterte sa posibleng subling ibalik ang hisgutanang pangkalinaw tali sa gobyerno sa Pilipinas ug sa komunistang grupo.
Sa interview sa RMN Malaybalay ngadto kang 1Lt. Tere Ingente, ang tigpamaba sa 4th Infantry Division, Philippine Army, gibutyag niini nga suportado nila ang lakang sa ilang commander-in-chief sa subling pagbalik sa peace talks.
Aduna matud pay mga kondisyon nga gibungat ang gobyerno alang sa hingpit na nga pagbalik sa peace talk apil na niini ang pagdeklara sa ceasefire, paghunong sa pagpangilkil sa mga NPA ug ang paghunong sa pagguba o pagpanunog sa kabtangan.
Samtang sa managbulag nga interview sa RMN gibutyag ni Ka Malem Mabini, ang tigpamaba sa Communist Party of the Philippines – New Peoples Army, North Central Mindanao Region, gibutyag niini nga welcome sa ilaha ang mao nga pamahayag sa Pangulo.
Kabahin matud pa sa rebolusyunaryong kalihukan ang pagka-bukas ni bisan kinsang administrasyon nga hisgutan ang ugat hinungdan sa armadong pakigbisog ug masulbad ang gubat sibil sa Pilipinas.
