Davao City – Sa tumong masanta ang insurhensiya ug terorismo nga mahitabo sa tibuok rehiyon onse ug labaw na sa siyudad sa Dabaw nga potesyal atakehon sa mga terorista tungod hometown kini ni Presidente Rodrigo Duterte, pormal nang naglagdaanay og kasabutan ang Police Region Office 11 ug Eastern Mindanao Command Philippine Army karong adlawa.
Gipangunahan ni PRO 11 Director Police Chief Superintendent Marcelo Morales ug 10th Infantry Division Philippine Army Commander Major General Noel Clement ang pagselyo sa ‘Joint Implan to Counter Insurgency and Terrorism’ nga gipahigayon sa Camp Quintin Merecido Camp, Catitipan, Buhangin District 9:00 sa buntag karong adlawa.
Paligunon sa maong panagsabot ang relasyon ug koordinasyon sa kapulisan ug militar aron pakusgan ang kampanya kontra insurhensiya ug terorismo nga binuhatan sa mga teroristang grupo sama sa CPP-NPA-NDF nga naglihukan alang sa pag-istablisar sa istabilidad ug kalinaw sa tibuok rehiyon onse.
Matud ni PRO 11 Spokesperson Police Chief Inspetor Jason Baria nga kabahin sa Joint Implan ang pag-mugna og konsepto, missions, tasks ug uban pa nga responsibilidad nga pagasaw-an sa rehiyunal nga buhatan sa kapulisan ug sa 10th ID nga ang pinakatumo mao ang pagtugbang sa mahitabo nga mga pagpamomba sa rehiyon gamit usab ang lima ka P’s Predict, Prepare, Prevent, Perform ug Post Action.
Mahimong buko-buko sa pag-abag ang ubang unit sa kapulisan ug sa Kasundalohan alang sa Operation, Intelligence, Police Community Relations and Investigations nga magsuporta sa AFP Triad nga gilangkuban sa Combat Operations, Intelligence and Civil Military Operations nga magbuntog sa mga komunista ug terorista.
Suma ni Baria nga lakip sa plano sa Joint Implan ang pakig-alayon sa mga lokal nga kagamhanan aron sa ingon mamintinar ang kahapsay ug kalinaw ug pagtubag sa uban pang hisgutanang siguridad sa tanang dapit sa Davao Region.
RadyoMaN Joel Viray
